Kuri uyu wa Gatandatu tariki 26 Ukwakira 2024 kuri Stade Santiago Bernabeu ikipe ya Real Madrid irakira FC Barcelona mu mukino w’umunsi wa 11 wa shampiyona y’icyiciro cya mbere muri Espanye. Uyu mukino uzwi nka El Clasico uhuza aya makipe y’ubukombe mu gihugu cya Espanye uba ari umukino ukomeye cyane ,urimo ishyaka ridasanzwe kuko ntabwo uba ari uw’amanota atatu gusa ahubwo ni urugamba.
Uyu mukino Real Madrid niwutsinda irahita ikuraho agahigo FC Barcelona yari yarakoze muri 2016 ko kumara imikino 43 idatsindwa muri shapiyona ya Espanye. Kugeza ubu Real Madrid imaze imikino 42 idatsindwa muri shampiyona, bivuze ko uyu mukino niramuka iwutsinze irahita ifata FC Barcelona
Amakipe yombi agiye guhura ari mu mwuka mwiza kubera ko muri iki Cyumweru mu mikino ya UEFA Champions League aheruka kwisengerera amakipe yo mu gihugu cy’u Budage aho ku wa kabiri Real Madrid yatsinze Borrussia Dortmund ibitego 5-2 naho bukeye bwaho FC Barcelona ikisengerera FC Bayern Munich iyitsinda ibitego 4-1.
Uyu mukino uje usanga abanya-Brazil babiri bakina muri aya makipe yombi, Vinicius Junior na Raphinha bahagaze neza aho buri umwe yatsinze ibitego 3 muri iyi mikino ya UEFA Champions League.
Aya makipe agiye guhura ku mukino w’umunsi wa 11 wa shampiyona anakurikirana ku rutonde dore ko FC Barcelona ari iya mbere n’amanota 27 naho Real Madrid ikaba iya kabiri n’amanota 24.
Uyu mukino uraba ari uw’i 189 uhuje aya makipe yombi muri shapiyona. Mu nshuro bamaze guhura Real Madrid yatsinzemo imikino 79 naho FC Barcelona itsindamo imikino 74 ,banganya imikino 35.Umukino uheruka guhuza aya makipe yombi muri shampiyona wabaye kuri 21 Mata uyu mwaka warangiye Real Madrid itsinze Fc Barcelona ibitego 3-2.
UMWANDITSI: Rukundo Jean Claude
