Kapiteni w’ikipe y’igihugu ya Argentina na Inter Miami yo muri Leta zunze ulUbumwe za Amerika, Lionel Messi yavuze ko Lautaro Martinez ari we abona ukwiye gutwara igihembo cya Ballon d’or uyu mwaka.
Ibi yabitangaje nyuma y’umukino ikipe y’igihugu ya Argentina yanyagiyemo iya Boliviya ibitego 6-0 aho yanatsinzemo ibitego bitatu naho Lautaro Martinez we atsindamo igitego kimwe.
Lionel Messi avuga ko Lautaro Martinez akwiye Ballon d’or kubera ko yakoze ibidasanzwe mu mwaka w’imikino ushize. Yagize ati” Lautaro Martinez yagize umwaka udasanzwe aho yatsinze igitego ku mukino wa nyuma wa kopa America, niwe watsinze ibitego byinshi. Akwiye Ballon d’or kurusha abandi.”
Uyu mukinnyi yatangaje ibi nyuma yuko mu minsi ishize Vinicius Junior yatangaje ko abizi neza ko ariwe azegukana Ballon d’or y’uyu mwaka.
Iki gihembo gitangwa n’ikinyamakuru France Football biteganyijwe ko icy’uyu mwaka kizatangwa ku wa 28 Ukwakira, abahabwa amahirwe yo kucyegukana akaba ari Vinicius Junior wa Real Madrid na Rodrigo ukina hagati mu kibuga muri Manchester City no mu ikipe y’igihugu ya Espanye.
Lautaro Martinez uri kuvugwa na Lionel Messi ko akwiye gutwara Ballon d’or, mu mwaka w’imikino wa 2023-2024 yakinnye imikino 44 atsindamo ibitego 35 atanga imipira 8 yabivuyemo kuri bagenzi be.
Yatwaranye kandi igikombe cya shapiyona y’u Butaliyani na Inter Milan ndetse n’igikombe kiruta ibindi mu Butaliyani.
Lautaro Martinez yatwaye kandi igikombe cya Copa America ari kumwe n’ikipe y’igihugu ya Argentina. Ku giti cye yatwaye gihembo cy’umukinnyi watsinze ibitego byinshi muri shapiyona y’ u Butaliyani ( 24) anatwara icyo muri Copa America nyuma yo gutsindamo ibitego 5.
UMWANDITSI: Rukundo Jean Claude
