Umuyobozi mukuru wa Manchester United (CEO), Omar Berrada, yatangaje ko iyi kipe ifite ikifuzo cyo gutwara Igikombe cya Shampiyona y’icyiciro cya mbere mu Bwongereza, Premier League, mu 2028.
Omar Berrada uri mu mwaka we wa mbere mu Buyobozi bwa Manchester United, yatangaje ibi mu nama yagutse yahuje abafatanyabikorwa b’iyi kipe itazirwa “Amashitani Atukura”.
Ibi biramutse bibaye, Manchester United yazatwara Igikombe, ubwo izaba yizihiza isabukuru y’imyaka 150 imaze ishinzwe.
Manchester United iheruka gutwara igikombe cya Shampiyona y’Abongereza mu mwaka wa 2013 ku bwa Sir Alexander Ferguson.
Kuva icyo gihe iyi kipe yazanye abatoza batandukanye barimo abakuru n’abato ariko umusaruro wayihesha Igikombe urabura.
Aba barimo David Moyez birananirana ayisigira Ryan Giggs nawe biranga mu mpeshyi ya 2014 baha akazi Louis Van Gaal nawe biranga.
Yaje gusimburwa na Jose Mourinho muri 2016 nawe aza gusimburwa na Ole Gunnar Solskjaer muri 2018 nyuma ye haje Michael Carrick muri 2021.
Uyu we yayitoje ukwezi kumwe gusa asimburwa na Ralf Rangnick wayijemo mu ntangiriro z’umwaka wa 2022 mu kwezi kwa mbere we yayitoje amezi atandatu, ayisohokamo mu mpeshyi y’uwo mwaka asimburwa na Erik Ten Hag, uri kuyitoza ubu aho amaze kuyitwariramo ibikombe by’imbere mu gihugu birimo FA Cup na Carabao Cup.
UMWANDITSI: Rukundo Jean Claude
